'Satan sê ek moet moor'
Aug 18 2008 09:43:52:040PM  - (SA)  

Druk artikel  E-pos storie aan 'n vriend

Jacques Pretorius (16), die oorledene. Foto: Verskaf

Verwante Berigte Skool laat nie veiligheidsontleding doen Liedjie inspireer glo moord in VSA Dié onnies mag vuurwapens werk toe vat

‘Wil jy iets cool sien?”

Met dié woorde het ’n “besete” en gemaskerde gr. 12-leerling van ’n Krugersdorpse skool voor sy skoolmaats ’n medeleerling met ’n Oosterse swaard doodgekap.

“Pasop, hy’t sy kop verloor!” het matriekleerlinge glo geskree oomblikke voordat Morné Harmse (18) van die Hoër Tegniese Skool Nic Diederichs in Krugersdorp-Wes ’n samoerai-swaard uitgeruk en Jacques Pretorius (16) in die nek gekap het.

Leerlinge het vertel Harmse was “van die duiwel besete” toe hy omstreeks 07:20 sy gewelddadige aanval begin het.

“Wil jy iets cool sien?” het Harmse glo aan ’n matriekmeisie gesê oomblikke voordat hy Jacques se hoofslagaar deurgekap het.

Jacques se beste vriend, J.C. Welman (16), het langs hom gestaan toe dit gebeur het. “Ek het nog gewonder of dit nie ’n joke is nie, maar toe sien ek hoe begin die bloed so by Jacques se nek uitborrel,” het J.C. in trane vertel.

Jacques is op die toneel dood, het mnr. Mark Stokoe, woordvoerder van Netcare 911, gesê.

Verskrikte leerlinge het vertel hoe Harmse, geklee in skoolklere en met ’n swart-en-bruin masker op sy gesig, in die gang afgeloop en sy swaard rondgeswaai het. Twee werkers van dié skool wie se name slegs as Sam en Joseph deurgegee is, het volgende onder sy swaard deurgeloop. Ook Stefan Bouwer (17) is raakgesteek, en ’n meisie het glo van skok ’n asma-aanval gekry.

Harmse het eindelik in ’n tuintjie langs die aantreeblok sy swaard se lem in die grond gedruk en gaan sit. Hy het sy masker afgehaal toe onderwysers nader kom en het sy met swart politoer-besmeerde gesig ontbloot.

“Wat het gebeur, wat het gebeur?” wou hy verdwaas van die onderwysers weet, wat hom personeelkamer toe geneem het.

Sy broer, Corné, ’n gr. 7-leerling, het later die swaard by hom gevat.

“Satan het gesê hy gaan my doodmaak as ek hulle nie voor die einde van die dag doodmaak nie,” het Harmse glo vroeër gesê.

Leerlinge was glo al besig met opening toe hulle polisiesirenes hoor.

“ ’n Onderwyser het gesê ons moet huis toe gaan tot verdere kennisgewing,” het ’n leerling vertel.

Volgens ’n betroubare bron het Harmse die oggend vier maskers, soortgelyk aan dié van die heavy metal-groep Slipknot, in sy skoolsak saamgebring. Hy het glo drie samoerai-swaarde by hom gehad.

Die bron het vertel die een masker was wit (soortgelyk aan dié van Slipknot se tromspeler Joey). Die ander een was ’n narmasker (soortgelyk aan dié van Shawn) en die derde ’n gasmasker wat die DJ, Sid, dra. Morné het glo die hoofsanger, Corey, se masker opgehad tydens die aanval.

Hy het glo ’n paar van sy vriende probeer oorreed om saam met hom die aanval uit te voer. “Hy’t vir hulle gesê: ‘Vandag is die dag dat julle dié wat teen julle was, kan terugkry.’ ”

Harmse het ook glo woorde soos “maskerade” en “bloedbad” gebruik.

“Sy vriende het gesê sy oë was rooi en swart, soos ’n mal mens s’n.”

J.C. is gister deur sy pa, Johan, sy ma, Christine, en sy vriend, J.P. Britz (17), ondersteun. “Ons het mekaar net ná 07:00 by die boom (naby die hoofhek van die skool) ontmoet, soos wat ons elke dag doen. Toe loop ons snoepie toe; Jacques het vir my rooi Foxi Nax gekoop en ons het dit op die trappe langs die snoepie geëet,” het J.C. vertel.

Volgens hom het Jacques en Harmse mekaar glad nie geken nie.

Hulle was op pad saal toe, toe die voorval gebeur het. J.C. het weggehardloop en sy pa op sy selfoon gebel. ’n Paar minute later het sy pa by die skool opgedaag en saam met hom na Jacques toe gegaan.

“Ek het met hom bly praat, want ek was bang hy verval in ’n koma. Ek het sy been vasgehou . . . sy oë was oop, maar ek het gesien dis reeds te laat,” het J.C. gesê.

Volgens J.P. Britz is Harmse skraal gebou met swart hare. Hy is glo ’n lid van die skool se noodhulpspan “en is teruggetrokke, maar lag altyd”.

Me. Elize Froneman, waarnemende direkteur van die Wes-Randse onderwysdepartement, het navrae na die Gautengse onderwysdepartement verwys.

Die drie beseerdes is na ’n hospitaal gebring. Hulle is almal teen druktyd ontslaan.

Beeld het vertroulik verneem Harmse en nog ’n 18-jarige seun is gister in hegtenis geneem. Kapt. Jacob Raboroko, polisiewoordvoerder, kon slegs een arrestasie bevestig. Die twee jongmans sal na verwagting more in die Krugersdorp-landdroshof op aanklagte van moord en poging tot moord verskyn.

Video's