2 onnies wil SA se kruine baasraak
Nov 21 2008 09:29:44:900PM  - (SA)  

Druk artikel  E-pos storie aan 'n vriend

Mnr. Francois McGill en me. Esna Roux, onderwysers aan die Hoërskool Lydenburg in Mpumalanga, wil binne nege dae die hoogste piek in elke provinsie uitklim. Die eienaar van Longtom Nissan, mnr. Fred Zeeman (regs), het verlede week 'n voertuig vir die stappers en hul logistieke span beskikbaar gestel. Foto: Lani Visser

Lydenburg. – Twee onderwysers van die Hoërskool Lydenburg in Mpumalanga wil die hoogste kruine in elk van Suid-Afrika se nege provinsies bereik, “want ons kan”.

Mnr. Francois McGill en me. Esna Roux wil dit boonop in nege dae baasraak, tussen 9 en 19 Desember.

Hulle het die plan gekry toe me. Thea-Mari du Rand, wat reeds van die hoogste pieke ter wêreld aangepak het, gasspreker by die skool se jaarlikse sportdinee was.

Die skool met sy 700 leerlinge het al die hoogste piek in Mpumalanga, De Berg, tydens ’n “Padlangs”-dag aangepak.

Avontuurlus vloei in albei dié onderwysers se are; dus was die nege pieke ’n uitdaging wat hulle nie kon weerstaan nie.

Roux, wat die Comrades al in minder as 10 uur kafgedraf het, het in Brittanje die Three Peaks Challenge aangepak waarin stappers die hoogste pieke in Londen, Skotland en Wallis binne 24 uur moes bereik. McGill is self geen vreemdeling in avontuurresies-kringe nie.

“Dit is ’n groot avontuur waarna ons ongelooflik baie uitsien. Ons wil ’n standaard daar stel vir ander om na te volg. Om suksesvol in ons doelwit te wees, moet ons 6 000 km ry en 6 000 m vertikaal klim,” sê McGill.

Hul voorbereiding het in April al begin. Die twee het fiets gery, gedraf, in die berge gestap en aan rogaine, ’n nuwe sport wat kaartlees, stap en fietsry insluit, deelgeneem.

Die nege kruine