Soldate moenie polisie se werk doen – Lekota
Feb 17 2009 09:02:36:860PM  - (SA)  

Druk artikel  E-pos storie aan 'n vriend

Mnr. Terror Lekota, president van Cope, steun nié die herinstelling van die kommandostelsel van die voormalige Suid-Afrikaanse Weermag om die platteland en die land se nasionale grense te beveilig nie.

Lekota het gister tydens ’n omvattende gesprek met Afrikaanse politieke ontleders en joernaliste in Johannesburg gesê soldate moet nie die polisie se werk doen nie.

“Ons het tydens die Kodesa-onderhandelinge ooreengekom dat daar net een owerheid (die Suid-Afrikaanse Nasionale Polisiediens) met arrestasieregte kan wees.”

Om burgerlikes in die hande van soldate te plaas kan “rampspoedig” wees. Lekota vrees soldate kan onnodige geweld teen burgerlikes gebruik en hul menseregte ontken omdat hulle nie vir polisiëringstake opgelei is nie. Die oplossing is ’n groter, beter opgeleide en goed toegeruste polisiediens.

Op ’n vraag waarom hy as oud-minister van verdediging die kommando’s ontbind het, het Lekota gesê hy het bloot die opdrag van die ANC-regering uitgevoer. “Ek was wel gekant teen die manier waarop dit gedoen is . . . ek wou hê die kommando’s moet uitgefaseer word namate die polisiediens vergroot word.”

Lekota is veral bekommerd oor die verpolitisering van die weermag en die polisie. “Dis wat hulle (die ANC van mnr. Jacob Zuma) gaan doen as hulle die komende verkiesing wen; dis wat hulle wil hê – ’n ANC-gesinde polisie en leër sodat hulle nooit die bewind aan enige ander party sal hoef te oorhandig nie.”