Druk artikel   E-pos storie aan 'n vriend

As daar nog ’n eensame siel was wat opreg geglo het in die nie-rassigheid van die ANC, is hierdie selfbedrog nou ontbloot met die uitlek van ’n Cosatu-plan om die DA in die Wes-Kaap te “kelder” (Rapport, 9 November).

Die vakbondmanne aan die hooftafel van mnr. Jacob Zuma se ANC sê die party moet “wit” skole in die Wes-Kaap aanval en aandring op “oop toegang” tot hierdie skole.

In hierdie stadium is dit reeds duidelik die DA in die Wes-Kaap gaan die ANC in volgende jaar se verkiesing ’n loesing gee. En soos dit maar gaan in tye van desperaatheid en nood, kom die handskoene af en val die ANC-lede terug op wat hulle die beste doen: raspolitiek.

Natuurlik het die Cosatu-verkiesingsplan niks te doen met “oop toegang” tot skole nie. Die Grondwet laat skole nie toe om leerlinge op grond van ras weg te wys nie.

Cosatu se teiken is eintlik moedertaalonderrig en spesifiek Afrikaans. Pleks daarvan om die getal en gehalte van Engelse skole in die Wes-Kaap te verbeter, is dit ’n gevestigde ANC-strategie om die druk van swak onderwysbeleid en -beplanning na Afrikaansmediumskole te verplaas en so Afrikaans as onderrigtaal te ondermyn.

So word die grondwetlike voorsiening vir moedertaalonderrig uiteindelik “onprakties” gemaak.

Die Wes-Kaapse onderwysminister het reeds in 2005 onsuksesvol probeer om die Afrikaanse enkelmediumskool die Laerskool Mikro te dwing om sy taalbeleid te verander, en meer onlangs het sy eweknie in Mpumalanga dit reggekry met die Hoërskool Middelburg – ten spyte daarvan dat slegs sowat 3% van skole landwyd nog Afrikaans as enkelmedium gebruik.

Cosatu weet dat die DA sal aandring op taalregte en die beskerming van Afrikaans, veral in ’n provinsie waar die meeste mense Afrikaans praat. Soos die ANC-gewoonte is, is die plan dan om die kwessie te verander in ’n rassegeskil en die DA gevolglik van “wit rassisme en bevoorregting” te beskuldig. Dis alles so voorspelbaar.

Wes-Kaapse kiesers moet kennis neem van die Cosatu-plan en van nuuts af besef hoekom dit tyd is om die ANC die rug toe te keer.