Druk artikel   E-pos storie aan 'n vriend

Die “Walvishoofstad van die wêreld” dra die kroon as Kaap-Rapport se Dorp van die Jaar 2008.

’n Verdeelde beoordelaarspaneel het 3-2 in die guns van Hermanus beslis, met Oudtshoorn in ’n uiters mededingende tweede plek.

Die derde finalisdorp, Robertson, het ook ’n baie waardige aanslag op die titel gedoen.

Kaap-Rapport se gewilde jaarlikse Dorp van die Jaar-kompetisie word gesamentlik deur Kaap-Rapport, Van Loveren en Cape Town Routes Unlimited (CTRU) geborg.

Sowel Hermanus as Oudts?hoorn het ’n groot impak gemaak met die verskeidenheid wat hulle as vakansiebestemmings aanbied.

Hermanus het benewens sy pragstrande en befaamde walvisse ’n pragtige wynroete in die Hemel-en-Aarde-vallei, puik restaurants, avontuursport en nog baie meer.

Ongeag wie jy is en wat jou begroting is, op Hermanus is daar verblyf-, eet- en vermaakkeuses sonder einde.

Die faktor wat die deurslag vir Hermanus gegee het, was dat dié dorp se sakelui en inwoners ooglopend “honger” was vir die titel.

Die dorp het in die eerste rondte by verre die meeste stemme onder inwoners gewerf en ook tydens die laaste SMS-rondte die meeste SMS’e ingestuur.

Baie van die aanvoorwerk vir Hermanus is gedoen deur die nuut gestigte Overstrand-bestemmingsbemarkingsorganisasie (OBBO). Hermanus is saam met Gansbaai, Stanford, Hangklip en Kleinmond deel van die streek Overstrand.

Dié organisasie mag in sy kinderskoene wees, maar kan nou reeds sy sukses meet met die Dorp van die Jaar-2008 titel.

Al drie die finalisdorpe was ongelooflik gasvry – dis nou maar eenmaal ’n eienskap wat eg is aan Kapenaars.

Al drie dorpe het ook beïndruk met die professionele manier waarop hulle besoekers ontvang. Die toerismebedryf is diensgerig – swak diens word al hoe minder geduld.

Innoverende dienste en produkte word aan besoekers gebied; daar is heeltyd ’n strewe om unieke ervarings te ontwikkel. Nuwe “feeste” om mense na elke dorp te lok, word steeds ontwikkel en bestaande feeste word konstant verbeter.

Diensverskaffers besef ook almal dat hulle in die huidige ekonomiese klimaat waarde vir geld moet bied.

Binne die toerismebedryf is bemagtiging van mense uit die voorheen benadeelde gemeenskappe ’n onvoltooide werk, maar jaar ná jaar kan Kaap-Rapport vordering op dié gebied sien. Handvlytondernemings, toneel- en musiekgroepe en sogenaamde homestays neem toe. Eienaarskap, aandeelhouding en die volhoubaarheid van sekere projekte is van die grootste uitdagings.

Die beoordelaars van die Dorp van die Jaar-kompetisie was Colette Janse van Rensburg (bemarkingsbeampte vir Kaap-Rapport), Hanlie Stadler (inhoudsredakteur van Kaap-Rapport), Julian Jansen (verslaggewer), Hetta Saunderson (mede-eienaar van M4 Artist Management, wat die borg Van Loveren verteenwoordig) en Suné Greeff (internasionale bemarker vir CTRU).

Hoewel die titel nou toegeken is, is dit nog nie die einde van Kaap-Rapport se Dorp van die Jaar-pret nie.

’n Heerlike makietie waar Afrikaanse kunstenaars gaan optree, word in Februarie 2009 op Hermanus aangebied.

Besonderhede hieroor sal nader aan die tyd bekend gemaak word.

) Vuka Scuta het vier bromponies vir die Dorp van die Jaar-kompetisie geskenk – drie wat reeds aan lesers gegee is in gelukstrekkings wat vroeër in die kompetisie gehou is en ’n vierde wat aan die wendorp se toerismekantoor geskenk word.

) Die OBBO het die handelsmerk waaronder dit die Overstrand gaan bemark – Cape Whale? Coast – dié week amptelik bekend gestel.

Clinton Lerm, voorsitter van die OBBO, sê walvisse is steeds die unieke verkoopspunt van die streek.

Lerm het beklemtoon dat elke produkeienaar en besigheid in die Overstrand die handelsmerk kan versterk deur grootskaalse blootstelling.

Lerm het gewaarsku dat toenemende ekonomiese druk ook sy merk op die toerismesektor sal maak en dat 2009 heelwat uitdagings vir dié sektor inhou.

Met verwysing na die 2010-Sokkerwêreldbeker het Lerm gesê dat dit as ’n verlengde toerismeseisoen in die Overstrand gesien moet word.

Hy het ook daarop gewys dat die politiek stabiele munisipaliteit in die Overstrand ’n sleutelrol speel om groei in die streek te bewerkstellig wat terselfdertyd gunstig vir die toerismebedryf is.

Onder projekte wat gedurende die OBBO se aanvangsjaar deurgevoer is, tel die druk van Cape Whale Coast-poskaarte, die instelling van ’n wêreldgehalte- webtuiste en die opgradering van die toerismekantore in Hermanus met onder meer kontakskermmasjiene met toerisme-inligting oor die Overstrand.

Die OBBO gaan 5 000 DVD’s en brosjures met generiese materiaal oor die Overstrand vervaardig wat plaaslik en internasionaal versprei sal word.