Druk artikel   E-pos storie aan 'n vriend

Johannesburg
Een van Suid-Afrika se hubaarste mans en die eerste Idols-wenner, Heinz Winckler (28), se rondloperdae loop môre ten einde. Hy trou op Erfenisdag in groot geheimhouding met sy verloofde, Aletté de Klerk (26).

Waar die geleentheid gehou gaan word, is 'n staatsgeheim. Na verneem word, is 205 mense op die gastelys en dié sluit in 'n paar van Heinz se vriende uit die vermaakwêreld en hul familielede. Sy akteur- broer, Giliam, is glo een van die strooijonkers, word gesê.

Aletté se vriendinne is die strooimeisies. Die radio-omroeper Jeremy Mansfield het die afgelope week op die lug gesê Heinz gaan by sy troue sing. Heinz en Aletté het mekaar verlede jaar tydens 'n kuiertjie by die sanger Joe Niemand se huis in Johannesburg ontmoet. Ná dié aand het die twee oor en weer gekuier totdat hy in Januarie vanjaar besluit het Aletté is die vrou vir hom.

Die verliefdes het by Kwaaiwater in die Hermanus-omgewing in die Wes-Kaap verloof geraak. Hy het haar as deel van sy plan aan 'n skattejag laat deelneem, het hulle in 'n vroeëre onderhoud aan Rapport gesê. Sy ouers het saamgespeel.

Briefies en leidrade het die niksvermoedende Aletté van Bettiesbaai na Kleinmond en toe uiteindelik Hermanus toe gelei waar Heinz in 'n wit aandpak gewag het. Hy het op sy knieë gegaan en haar gevra om met hom te trou.

Tussen die trane deur het sy geknik, het hulle vroeër gesê.

Ná die troue vlieg die paartjie na 'n oorsese bestemming. Hulle sal 'n bietjie meer as 'n week daar deurbring.

Sy DVD Heinz Winckler Live sal in November vanjaar op die rakke wees.