Druk artikel   E-pos storie aan 'n vriend

Phat Joe.

Johannesburg

Die gewilde geselsprogram-aanbieder Phat Joe is in ’n rasseherrie gewikkel oor ’n grap op Kaya FM dat daar gereël kan word om wittes “hul dood te help reël”.

Die Uitsaaiklagtekommissie van Suid-Afrika (Ukksa) het ’n klag ontvang dat hy die uitsaaikode oortree het deur rassistiese haatspraak aan te blaas.

Me. Merrill Plagis, ’n gereelde luisteraar na dié radiostasie, het Vrydag die klag ingedien nadat Phat Joe glo Donderdagoggend in sy ontbytprogram die stelling in ’n fop-advertensie gemaak het.

Volgens Plagis het Phat Joe gemaak of hy dienste van ’n denkbeeldige ondernemer, Bling Bling Funerals, adverteer.

“Aan die einde van die advertensie sê Phat Joe net swartes mag aansoek doen. Hy eindig dan die advertensie met die gewraakte woorde: ‘Geen wittes nie, maar ons kan jul dood vir julle help reël,’ ” sê Plagis.

Plagis sê sy is geweldig ontsteld oor die “onverantwoordelike stelling”, veral in die huidige politieke klimaat van xenofobiese geweld teen verskeie etniese en rassegroepe.

“Dit is ’n siek grap. Ek glo Phat Joe is onverantwoordelik, want hy is daardeur besig om rassehaat aan te vuur.”

Plagis sê as ’n gereelde luisteraar na radiostasies waarvan die teikenmark meestal swart is, ervaar sy dat ál meer rassistiese stellings daarop gemaak word.

“Dit is onsmaaklik en ek meen enige verantwoordelike radiostasie moet beheer hieroor uitoefen en teen radiopersoonlikhede optree wat rassisme aanwakker.”

Mnr. Neil Johnson, inhoudredakteur van Kaya FM, sê die Bling Bling-advertensie is deel van ’n reeks fop-advertensies om Phat Joe se ontbytprogram te adverteer.

“Die advertensies is nie op wittes gemik nie en dit steek die draak met alle groepe in die land.”

Johnson sê dit word sedert Februarie uitgesaai en dit is die eerste keer dat ’n luisteraar daaroor kla.

Johnson sê Kaya FM kan nie verdere kommentaar lewer voordat hulle die klag van Ukksa ontvang het nie.