Druk artikel   E-pos storie aan 'n vriend

Mnr. Bryan Ferreira, wat gister in 2 Militêre Hospitaal in Wynberg om sy lewe geveg het nadat 'n skroewedraaier sy skedel deurboor het.

Kaapstad

’n Afgetrede lugmagonderoffisier het gisteraand nog in 2 Militêre Hospitaal in Wynberg om sy lewe geveg nadat sy skedel Dinsdagoggend, kort ná middernag, in ’n wrede aanval met ’n skroewedraaier deurboor is.

Mnr. Bryan Ferreira (64) is sedert Dinsdag in ’n diep koma en dokters het sy familie gister meegedeel daar is nie hoop vir hom nie.

Die 20 cm lange metaalpunt van die skroewedraaier, met wit maskeerband om die handvatsel, het Ferreira se skedel by sy linkerslaap binnegedring en byna agter sy regteroor uitgekom.

Ferreira was van sy winkel in Parklands, naby Tableview in Kaapstad, op pad huis toe toe hy buite sy huis oorval is.

Sy vrou, Marie (62), en sy jongste dogter, Maryan (29), het nie die aanval gehoor nie en Maryan het haar bewustelose pa eers Dinsdagoggend omstreeks sesuur langs die voorstoep aangetref.

“Hy het gelê asof hy rustig slaap, met sy hande onder sy kop. Toe maak die ambulansman dit af as ‘ ’n dronkslapie’, dít terwyl my pa ’n geheelonthouer is. Toe hulle hom omdraai, het ons die skroewedraaier in sy kop gesien.

“Ons het niks gehoor nie. Gewoonlik vat pa altyd sy hond en sy assegaai saam as hy snags verdagte geluide buite die huis hoor.”

Geen besittings word vermis nie.

Ferreira se ander dogter, me. Maré Sieling (33), sê die polisie se forensiese span het eers Vrydag die misdaadtoneel besoek. Toe het reënbuie reeds die bloed teen die mure en die spore van Ferreira se aanvaller(s) uitgewis.

Sieling en haar man, Wouter, emigreer oor drie weke na Melbourne, Australië, “deels oor die hoë misdaad in ons land”, sê sy.

Ferreira, oorspronklik van Jagersfontein in die Vrystaat, was ’n kommunikasiebeampte in die lugmag en het voorheen by die Ysterplaat-lugmagbasis gewerk. Hy het ook al die Kaap-na-Rio-bootvaarte as bemanningslid meegemaak.

Volgens supt. André Traut, polisiewoordvoerder, word ’n klag van poging tot moord ondersoek, maar niemand is nog in hegtenis geneem nie.