Druk artikel   E-pos storie aan 'n vriend

Só het Rapport einde Julie vanjaar berig oor die dood van mnr. Roy Munks toe daar nog geglo is dat 'n buffel op sy plaas hom noodlottig beseer het.

Hoedspruit

Die ondersoek na die dood van ’n sakeman van die Oos-Rand wat einde Julie vanjaar dood is nadat hy glo deur ’n buffel op sy spog-wildplaas buite Hoedspruit aangeval is, het ’n dramatiese wending geneem.

Twee mans van die Hoedspruit-omgewing is in hegtenis geneem weens sy dood.

Die polisie glo nou mnr. Roy Munks (65) is in ’n rooftog vermoor.

Die aanvallers het hom vermoedelik met messe gesteek. Hulle wou hom waarskynlik vermoor en daarna die plaashuis plunder, maar hulle het op die vlug geslaan toe hy hard begin skree het.

Net ná Munks se dood het die polisie bevind hy het doodgebloei nadat hy deur ’n buffel aangeval is. Tydens ’n lykskouing is bevind die wonde aan sy bolyf het ooreengestem met beserings wat deur ’n buffel se horings veroorsaak kan word.

Daarbenewens het spoorsnyers – wat deur die polisie ingeroep is – net ná Munks se dood bevind daar was buffelspore naby die lyk.

Maar nou het twee verdagtes wat aangekeer is weens huisbraak in Hoedspruit tydens ondervraging hul monde verbygepraat. Hulle het erken hulle was betrokke by Munks se dood.

Die mans is van moord aangekla en word aangehou. Supt. Daniël Ramakgoakgoa, die bevelvoerder van die polisie in Hoedspruit, wou nie Vrydag die verdagtes se name bekend maak nie omdat die saak in ’n sensitiewe stadium is.

Munks se seun, Clive, het Vrydag gesê al het die polisie destyds vir hom gesê ’n buffel het sy pa se dood veroorsaak, het hy van die begin af vermoed daar steek dalk meer in sy dood.

’n Plaaswerker het hom glo vertel hy het die aand van sy pa se dood gehoor hoe Munks uitroep: “Help, hulle het my geskiet!”

Hy is oomblikke later dood. Dié inligting is die aand van Munks se dood aan die polisie verskaf.

“Hoekom sou my pa so iets uitgeroep het as hy deur ’n buffel aangeval is,” vra Munks se seun. “Dis moeilik om te sê of ek nou kwater is omdat mense, en nie ’n dier nie, my pa se dood veroorsaak het.

“Maar ek is minstens verheug dat die aanvallers vasgetrek is. Ek hoop net hulle kom nie maklik los nie, ” sê Munks jr.

Hy sê dis tragies dat sy pa vermoor is, want hy het vas geglo aan Suid-Afrika se toekoms.

Toe ’n familielid in ’n stadium Nieu-Seeland toe is met die oog op moontlike emigrasie, het Munks sy optrede gekritiseer.

Hy het gesê hy gaan nêrens heen nie, hy bly in Suid-Afrika, sê Munks jr.