J.J. Harmse, Londen    

Druk artikel   E-pos storie aan 'n vriend

Die Springbok-haker, Bismarck du Plessis, kom vandag onder die mes vir ‘n kniebesering, terwyl Juan Smith en Fourie du Preez Saterdag se toets teen Engeland uit Suid-Afrika sal dophou.

Albei het Vrydag huistoe gevlieg nadat hulle nie oorweeg is vir die toets op Twickenham nie. Smith het harsingskudding opgedoen teen Skotland, terwyl Du Preez net voor daardie toets sy bobeenspier geskeur het.

Du Plessis, wat ‘n dyspier geskeur het teen Skotland, is deur sy broer, Jannie, vervang en dié Natalse stut sal Saterdag, soos verwag, die nommer drie-trui by John Smit oorneem. Smit skuif terug na haker, waar hy die meeste van die wedstryd teen Skotland moes speel.

Danie Rossouw vervang Smith langs die kant van die skrum.

“Ek het my kop teen ‘n Skot se knie gestamp en teen Dinsdag kwaai simptome begin voel,” het Smith verduidelik.

Du Preez was hoopvol dat hy sou herstel, maar kon nie die span se oefensessie vanoggend voltooi nie.

Du Plessis, Gurthrö Steenkamp, Du Preez en Smith se beserings beteken dat afrigter Peter de Villiers nie net vir Rossouw in die beginspan kon opneem nie, maar ook speelkans aan Chiliboy Ralepelle en Heinrich Brüssow kon gee. Beide is as plaasvervangers gekies.

Brüssow was kinderlik opgewonde oor die kans.

“Dit is amper te goed om waar te wees. Ek gee nie om hoe lank ek speelkans kry nie, net solank dit gebeur. Ek kan nie wag vir Saterdag nie,” het die baljagter aan Rapport gesê.

Dieselfde agterlyn wat teen die Skotte begin het, sal dus teen Engeland uitdraf, terwyl Du Plessis en Rossouw voorlangs bykom.

Slegs nege spelers het in verlede jaar se Wêreldbeker-eindstryd teen Engeland gespeel.

Die span is: Conrad Jantjes (23), JP Pietersen (23), Adi Jacobs (20), Jean de Villiers (45), Bryan Habana (45), Ruan Pienaar (26), Ricky Januarie (33), Pierre Spies (18), Danie Rossouw (35), Schalk Burger (48), Victor Matfield (79), Bakkies Botha (54), Jannie du Plessis (6), John Smit (80), Beast Mtawarira (9). Plaasvervangers: Chiliboy Ralepelle (2), Brian Mujati (11), Andries Bekker (12), Ryan Kankowski (6), Heinrich Brussow (-), Frans Steyn (26), Jaque Fourie (35).