Druk artikel   E-pos storie aan 'n vriend

Me. Jolene en mnr. Charl Sampson. Hulle eis byna R3 miljoen van die munisipaliteit en die polisie oor beweerde nalatigheid. (Foto: Dawie van Heerden)

Port Elizabeth

’n Egpaar wat hul babadogter en hul ongebore kind twee jaar gelede tydens ’n vloed verloor het, eis nou sowat R3 miljoen van die munisipaliteit en die polisie weens beweerde nalatigheid.

Mev. Jolene Sampson en haar man, Charl, hoop die hofsaak sal bydra om soortgelyke tragedies in die toekoms te voorkom.

Jolene was drie maande swanger toe die motor waarin sy en haar driejarige dogtertjie, Kayla, in Augustus 2006 deur vloedwater meegesleur is. Hulle was op pad na ’n speelgroepie.

Klein Kayla se lyk is ure later gevind. Jolene het uit die siedende watermassa ontkom en is later deur haar broer gekry waar sy aan die wal van die Baakensrivier aan boomwortels en takke vasgeklou het. Sy het haar ongebore baba, wat die Sampsons se tweede kind sou wees, kort ná die tragedie verloor.

Sampson-hulle voer in hofstukke aan die metroraad en die polisie het nie genoeg gedoen om mense teen die gevaar van die vloedwater te waarsku nie.

Hulle eis altesame R2 943 669.

“Dit is nou al twee jaar gelede, maar die gebeure en die verlies van ons dogtertjie en ons ongebore baba spook steeds by ons,” sê Jolene.

“Ek kan nie veel onthou van wat gebeur het nie. Ek onthou die water het ons meegesleur en dat ek gedink het ek is verlam toe ek in ’n sta?dium die wal van die rivier bereik het. Wat tussenin gebeur het, is ’n raaisel,” sê Jolene. ’n Arm en haar bekkenbeen was gebreek en sy was vol kneusplekke.

Sampson-hulle se prokureur, mnr. Robin O’Brien, sê hulle het die meriete van die saak ondersoek en meen die munisipaliteit en die polisie het ’n plig gehad om mense te waarsku of om die pad te sluit. Hy sê hulle het getuies wat sal getuig dat die polisie die aand voor die tragedie oor die vloedgevaar gewaarsku is.