Druk artikel   E-pos storie aan 'n vriend

Prof. Ezekiel Moraka, huidige viserektor van studentesake van die Universiteit Vrystaat.

Bloemfontein

Die volgende rektor van die Universiteit Vrystaat (UV) sal uit ’n kortlys van drie kandidate aangewys word.

Hulle sal tydens die finale keuringsproses ook in die openbaar teen mekaar te staan kom. Aansoeke om dié gesogte pos sluit oormôre.

Omdat die voorsitter van die UV-raad, regter Faan Hancke, reeds aangedui het dat prof. Frederick Fourie se opvolger ’n swart of bruin rektor gaan wees, word daar tans in die UV-wandelgange bespiegel wie die leisels in dié onstuimige tyd sal opneem.

Prof. Teuns Verschoor, waarnemende rektor van die UV, het Vrydag gesê die aansoeke om die pos word deur ’n buite-agentskap gehanteer. Die agentskap sal ’n konsep-kortlys saamstel wat aan die UV se keurkomitee voorgelê sal word.

“Die laaste fase van die keuringsproses sal tussen drie kandidate wees. Die nuwe aanstelling sal op die raadsvergadering in Maart 2009 goedgekeur word,” sê hy.

Die huidige viserektor van studentesake aan die UV, prof. Ezekiel Moraka, het sy aansoek die afgelope week ingedien. Moraka sê die rassespanning het vir ’n moeilike jaar gesorg, maar hy het vertroue in die toekoms.

Nog ’n kandidaat wat goed vertroud is met die transformasieproses aan die UV is ’n gewese viserektor van dié universiteit, prof. Benito Khotseng. Hy het tydens die rektorsverkiesing in 2002 teen Fourie verloor. Khotseng is tans ’n konsultant wat op topbestuursvlak kursusse in leierskap aanbied.

Khotseng het die transformasieproses in 1994 aan die UV begin en is deur Hancke geloof vir sy bydrae toe hy in 2003 ’n vise-rektorspos aan die Universiteit Kaapstad aanvaar het. Hy is sedert 2002 ’n bestuurslid van die Suid-Afrikaanse Wetenskap-akademie. Hy geniet ook groot aansien by tersiêre opvoedingsinstansies en maatskappye in die buiteland.

Intussen gaan dit broekskeur by die UV om te sorg dat minstens 30% van die eerste- en tweedejaars van ’n bepaalde rassegroep in alle koshuise is. Volgens die UV het net meer as die helfte van die studente wat sedert Junie ’n aanbod om verblyf ontvang het, dit aanvaar.

Verschoor sê die integrasiedoelwitte vir die koshuisplasingsbeleid is tans nog nie bereik nie omdat dié plasings merendeels nie aanvaar word nie.

“Daar is wel mooi pogings deur studente, soos die 13 wit senior studente wat na vore gekom het om met die integrasieproses te help. Dié studente het versoek om in Tswelopele (’n manskoshuis met swart studente) geplaas te word.

“Ouers het van die poging gehoor en is bereid dat hul kinders ook in Tswelopele geplaas word,” sê Verschoor.