Druk artikel   E-pos storie aan 'n vriend

Die konsentrasiekampbegraafplaas op Doornbult in die Noord-Kaap. (Foto: verskaf)

Johannesburg

Die Erfenisstigting wil dringend probeer keer dat delwers na diamante delf op ’n plaas in die Noord-Kaap waar erfenisgoedere van kultuurhistoriese waarde nog onaangeraak lê.

Die stigting het ’n huurkontrak vir tien jaar vir die gebied Doornbult op die plaas Kromhout tussen Orania en Hopetown waarop ’n konsentrasiekampbegraafplaas en oorblyfsels van die konsentrasiekamp is.

Dit dateer van die Anglo-Boereoorlog toe byna 16 000 Britse troepe in 1899 hier saamgekom het om voor te berei vir die inval in die destydse Oranje-Vrystaat. Vandag is hier nog oneindig baie kultuurskatte.

Genl. Gert Opperman, uitvoerende hoof van die Erfenisstigting, sê die gebied is so uitsonderlik dat bitter min mense hier toegelaat word.

“Die stigting het reeds baie werk hier gedoen. ’n Museum is gebou en argeologiese opgrawings word gereeld gedoen. Ons bewaar die gebied jaloers.”

Opperman sê na verneem word wil ’n delwersmaatskappy, Purple Fountain Properties, ’n prospekteerpermit vir die terrein bekom.

Die stigting het sy kommer daaroor by die Suid-Afrikaanse Erfenishulpbronagentskap (Sahea) geopper.

“Ons het die departement van minerale en energie in die Noord-Kaap gevra om ’n volledige studie te doen oor die uitwerking daarvan op die gebied, wat volgens wet gedoen moet word wanneer aansoek gedoen word om te delf op enige argeologiese terrein wat meer as 100 jaar oud is,” sê mnr. Solayman Ibrahim, woordvoerder van Sahea.

Sahea het al ’n jaar gelede vir die departement hieroor geskryf, maar nog geen reaksie gekry nie.

“Ons is baie bekommerd. Dit is ’n baie belangrike erfenisbron van nasionale belang,” sê Ibrahim.

Opperman sê die Erfenisstigting het ook geen reaksie gekry op briewe wat aan Purple Fountain Properties geskryf is nie.

“Die eienaars van die plaas, mnr. Lemmer Wiid en sy vrou, Riena, is ook baie bekommerd. Hulle het ’n groot liefde vir die plek en het baie moeite gedoen om dit te bewaar,” sê Opperman.