Druk artikel   E-pos storie aan 'n vriend

Kevin Abdrawan (36) is “in die oerwoud” in die suide van Maleisië gebore. Hy het soggens deur ’n rivier met krokodille skool toe geswem.

Van spoeltoilette, elektrisiteit of ’n telefoon het hulle nie geweet nie.

Dit was ’n nagmerrierit na Kuala Lumpur, ás jy so gelukkig was om ’n motor te besit.

“My pa het my op 11 uit die skool gehaal. Hy’t gesê as ek geld kan tel, weet ek genoeg. Toe is ek plaas toe om te boer.”

Abdrawan is ’n toergids in die Maleisiese hoofstad. Hy is ’n Bumiputra, of “Son of the Soil”.

As ’n eg Maleisiese boorling word hy bevoordeel deur regstellende aksie wat sedert 1971 hier geld. Dié beleid moet die Bumiputras, wat 60% van die Maleisiese bevolking uitmaak, uit erge armoede ophef.

Sy vertroue is onwrikbaar in die Barisan Nasional (BN) – ’n koalisie van minstens 13 politieke partye – wat sedert 1957 regeer.

“Mense kla oor korrupsie. Ek sê dis orraait, hulle kan maar ’n bietjie (geld) vat solank hulle na my ouers in die oerwoud kyk.”

Abdrawan oordeel die BN aan die verandering in lewenstandaard. “Die regering was goed vir ons. Ons dorpie het nou ’n hospitaal, skool, water en elektrisiteit. Daar is paaie en internet wat my pa-hulle nie wil gebruik nie.”

Hy is liries oor die land se infrastruktuur en onderwys. “Ek is al 18 jaar in Kuala Lumpur. Ek het gesien hoe dinge verander. Die stad ontwikkel heeltyd én dis veilig.”

Kritiek teen die vorige staatshoof, mnr. Abdullah Badawi, is vir hom vergesog.

“Jy kan nie vir 25 miljoen mense gee wat hulle wil hê nie. Nes ’n pa nie alles op een slag vir al sy kinders kan gee nie. Dié wat kla oor inflasie moet harder werk as hulle Starbucks(-koffie) wil drink, of in die trein werk toe ry. Jy besef hoe maklik ons dit het as jy op die Discovery-kanaal sien hoe mense in Afrika leef.”

Abdrawan wil oor twee jaar terugkeer “oerwoud” toe om sy pa se plaas in ’n kommersiële boerdery te omskep.

Die regering betaal sy deeltydse landbou-opleiding. Hulle voorsien die kapitaal om die boerdery aan die gang te kry en ontvang 60% van die wins. Die boerdery word eers ná vyf jaar aan hom oorgedra wanneer hy die vaardighede het om dit op sy eie te bestuur.

“Ek het nie ’n graad nie, die lewe is my leerskool. Boere slaap op hul geld.

“Grond is rykdom en die regering gaan my help om daarop te plant.”