Druk artikel   E-pos storie aan 'n vriend

Ard Matthews, hoofsanger van die groep Just Jinjer.

Verwante Berigte Luister: Fight for Zimbabwe

Kaapstad

Toe die stembrief vir die tweede presidentsverkiesing vanjaar in Zimbabwe net die naam Robert Mugabe op gehad het, het Ard Matthews, hoofsanger van die groep Just Jinjer, uit protes ’n liedjie geskryf.

Nou wil hy met dié lied geld insamel vir ’n liefdadigheidsorganisasie.

Met “Fight for Zimbabwe” prys hy Morgan Tsvangirai omdat hy Mugabe teengestaan het. En hy kritiseer die res van die wêreld wat met gevoude hande toegekyk het hoe Tsvangirai deur Mugabe en sy trawante geboelie word.

“As jy van ’n plek af weggaan, doen jy meer moeite om op die hoogte met die nuus te bly as wanneer jy nog daar is,” het Matthews verlede week uit Los Angeles aan Rapport gesê. Hy en die ander lede van Just Jinjer het in 2000 na Londen verhuis en in 2003 in Amerika wortel geskiet.

“Ek was opgewonde oor die vooruitsig van ’n regverdige verkiesing in Zim. Maar toe ek sien hoe dit eindig, was ek die moer in,” sê hy in perfekte Afrikaans. Hy het “Fight for Zimbabwe” die week ná die verkiesing geskryf.

“Die liedjie is ’n solo-poging en dit het niks met Just Jinjer te doen nie.

“Ek is die internasionale ambassadeur vir die liefdadigheidsprojek My Life Foundation in Kaapstad, waar hulle met gerehabiliteerde straatkinders werk.

“Die liedjies wat ek as Ard Matthews skryf, wil ek aanlyn verkoop en die geld vir die kinders gee. Die Zim-liedjie is net een van dié liedjies.”

“Fight for Zimbabwe” kan reeds op www.ardmatthews.com gehoor word, en oor ’n week of twee sal mense dit ook kan koop en van die internet aflaai.

Wat Matthews se liefdeslewe betref, gaan dit nog uitstekend met hom en die model Landi Swanepoel.

Hulle was juis aan die ontbyt koop toe hy met Rapport gepraat het.

Swanepoel is die Peroni-gesig en ’n model vir Guess en Victoria’s Secret.