Druk artikel   E-pos storie aan 'n vriend

Dr. Marc Roscher en sy vrou, Ida, van Umhlanga was tydens die Moembaai-aanvalle in die Taj Mahal-hotel. Hulle het ongedeerd weggekom, maar moes al hul bagasie agterlaat. Hier is hulle tydens 'n vakansie verlede jaar in Italië.

Pretoria

Mnr. Bobby Roscher is baie dankbaar hy was Donderdag sonder sy selfoon op die gholfbaan.

“Ek is al die spanning gespaar,” sê hy oor die senutergende nag wat sy seun, dr. Marc Roscher, en sy skoondogter, Ida, gedurende die Taj Mahal-hotel se terroriste-krisis deurgebring het.

Bobby het eers teen 14:00 die middag (Suid-Afrikaanse tyd) van dié drama gehoor.

“Hulle was toe al uit die hotel.”

Al wat hulle kon saamneem toe hulle uit hul hotelkamers gered is, was hul paspoorte.

“Maar wie gee nou om oor bagasie,” sê Bobby met ’n breë glimlag.

Hy is oneindig verlig dat sy enigste kind veilig is – en dat hy net die goeie nuus gekry het.

“As ’n mens moet hoor van bomme en vlamme en mense wat skiet én jou seun is daar …”

Marc, ’n dermatoloog van Umhlanga, en sy vrou het Dinsdagaand uit Johannesburg na Indië vertrek waar hy ’n konferensie sou bywoon.

Ondanks die trauma wat hulle beleef het, het hulle besluit om aan te bly in dié land. Bobby dink sy seun het die regte besluit geneem.

“As ek hy was, sou ek ook voortgaan met my program.

“Alles wat in Moembaai gebeur het, is nou verby.

“As iemand nou iets wil doen, met al daardie polisie daar, moet hy regtig baie dig wees.”